ACTIONTHRILLER

Regi: Frederik Louis
Hviid og Anders Ølholm

Shorta

Med: Jacob Lohmann, Simon Sears, Tarek Zayat
Kinofilm

Ein ung mann frå ein fattig dansk forstad døyr på suspekt vis hjå politiet. Dei får melding om å unngå det ulmande området, men Jens (Sears) må på tokt med den brutale kollegaen Mike (Lohmann), som likevel svingar inn for å plaga folk og visa kven som er sjef. Det går dårleg.

Sterk spenning

Som spenningsfilm held Shorta høgt nivå med adrenalin og driv heile vegen. Det er solid arbeid i alle ledd i kjende sjangerrammer utan for slitne stiltrekk. Skodespelet er sterkt. Figurane er dynamiske og interessante.

Vi ser alt frå politiet sitt perspektiv, men ingen med eit fungerande moralsk kompass likar Mike. Han er bølla, medan Jens er på lag med folk. Han rynkar litt på nasen når kollegaen kjem med rasistiske vitsar.

Vi og Jens heiar på unge Amos, som utan grunn hamnar i hendene på politifolka. Dei tre er fritt vilt i ei intens jakt med få fluktruter. Politifolka er på bortebane. Jens og Mike har sjølve skulda. Dei er òg del av eit system som skaper sinne og vald.

Hjarterått

Shorta tyder politi på arabisk. Dansk er framandspråk i forstaden. Dei som bur der, føler seg med rette elendig handsama. Det er lett å sjå parallellar til filmar som franske De elendige frå i fjor.

Med eit rått filmspråk for eit breitt publikum pirkar regissørane Frederik Louis Hviid og Anders Ølholm i opne sår. Shorta er eit slag i magen. Eg hadde hjarta i halsen. Filmen har hjarta på rette staden.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.