«Orsak, eg hadde planar om å senda teksten tidlegare i dag, men vi har hatt tre varsel om luftåtak sidan morgontimane, og nokre ekle eksplosjonar rundt heile Kyiv.» Meldinga er frå Andrej Kurkov, forfattaren som skriv om Ukraina-krigen for Dag og Tid, og som gjer at vi får ei unik innsikt i korleis livet er i det krigsherja landet.

Som vi skjønar av meldinga til Kurkov denne veka, er situasjonen vanskeleg. Flyalarmen i Kyiv hadde starta litt før klokka 6 om morgonen tysdag. Gjennom dagen opplevde byen ti rakettnedslag.

Som i fjor vinter driv Russland og bombar over store delar av landet for å gjera livet verst mogeleg for sivilbefolkninga og bryta ned viljen deira til å halda fram krigen. Fleire bustadbygg i Kyiv vart skadde etter den russiske bombinga tysdag.

Dei mange rakettnedslaga er eit klart døme på at fleire russiske rakettar enn tidlegare klarer å trengja gjennom det ukrainske luftforsvaret. Ifylgje ukrainske styresmakter sende Russland tysdag 41 rakettar inn over landet. 20 av dei klarte ikkje ukrainarane å skyta ned. Seks menneske vart drepne og 70 skadde denne tysdagen i Ukraina.

Det vert no ymta om at Ukraina er i ferd med å gå tom for luftvern. Det er i så tilfelle katastrofalt for sivilbefolkninga. Det gode luftvernet til no har nettopp gjort at mange har vorte verande i landet trass krigen, også som interne flyktningar. At dei vert verande, er avgjerande for at Ukraina skal ha sjanse til å stå imot den russiske invasjonen.

Det er ingenting som tyder på snarleg fred eller at russarane gjev opp bombinga. Det er difor viktig at Ukraina får nok våpen og luftvern til å stå imot åtaka. Noreg må bidra det vi kan i så måte. Vi må halda fast ved at det er krig i Europa, og at Ukraina må få naudsynt våpenhjelp.

Svein Gjerdåker