Pop

Bisse:

19.6.87

Showbisse Inc.

Tidlegare i år gjorde Bisse reint bord på Steppeulven, prisutdelinga til Foreningen af Danske Musikkritikere. Førre veke spelte artisten – som læt som David Bowie og The Cures Robert Smith blanda med drømmande post-rock og Klaus Nomis energiske, eksentriske og teatralske sceneshow – tre konsertar i Noreg i høve det sjuande albumet: 19.6.87.

Tittelen er Bisses bursdag, og det storslegne opningssporet blir introdusert av barnleg, eksperimentell pianoklimpring. Slike lydopptak frå familiearkivet fungerer som overgangar låtane imellom plata gjennom, og omslaget hintar om ein nostalgisk bromance: På framsida ser vi vokalisten og den næraste musikalske samarbeidspartnaren hans side om side, truleg rundt 10-årsalderen. Baksida er på si side pryda med ein collage av gamle dataspelcover – frå actionspelet Half-Life til spelutgåva av Sofies Verden. Dette kan kallast ei danningsplate, der Bisse ser tilbake på transformasjonen frå leiken legeson til artist i full bløming – stadig leiken, men kan hende med fleire sjelelege kvalar.

Store delar av popkulturen i dag er prega av enorme mengder nostalgi, noko South Park parodierer med tomt mimrande «Memberberries». Men der nye Star Wars-filmar og liknande omkalfatringar av gamle kulturelle fenomen berre ser ut til å vere motiverte av inntening, meistrar Bisse og makkerane hans å lage poesi av minne frå oppveksten – om venskap, rivne hus, krokfot og forelsking i alle i Spice Girls. Det er faktisk rørande.

Rasmus Hungnes

Rasmus Hungnes er musikar og fast platemeldar i Dag og Tid.