Elektronika

Yves
Tumor:

Safe In The Hands Of Love

Warp Records

Yves Tumor, ein flyktig figur som ein ikkje med sikkerheit kjenner fødenamnet og bustaden til, hevdar sjølv å vere inspirert av industrial-pionerane Throbbing Gristle. Utover det virtuost eksperimenterande musikalske handverket er det tydelege likskapar mellom Tumors og Gristle-frontperson Genesis Breyer P-Orridges særeigne og kjønnsbøyande image.

Sjangermiks

Dei ti spora på plata sneiar innom litt av kvart av sjangrar. I den eine augneblunken er spenstig pop à la Beck eit tydeleg referansepunkt, i den neste forvridd soul, R&B, funk og hip- og triphop, så chillwave og andre avartar av elektronisk dansemusikk. Spor etter Swans’ postindustrielle ritualpunk er òg til stades i durabelege mengder, ikkje minst i avslutningssporet «Let The Lioness In You Flow Freely», eit av dei mest høglydte på plata. Med ramsalt, monotont trommespel spekka med vreng, buldrande basstonar og ein countryaktig insektsverm av horn og strengar, læt dette som underhaldning på det mest hardsette tilfellet av låvedans som tenkjast kan.

Heilskap

Yves Tumors tredje album er kompromisslaust, men samstundes inkluderande og tilgjengeleg: Dette er dryg og hardnakka musikk, samstundes som det er kjenslevart og fengjande. Lyrikken (her vert tung kost som politivald og forskjellige former for diskriminering handsama) og musikken går opp i ein heilskap som kjennest svært presserande og samtidig.

Rasmus Hungnes

Rasmus Hungnes er musikar og fast musikkmeldar i Dag og Tid.