Rock

Tim Heidecker:

Too Dumb For Suicide: Tim Heidecker’s Trump Songs

Jagjaguwar

Tim Heidecker er kjend for ei kompromisslaus form for antihumor, tufta på lag på lag med ironi. Ved sida av TV-seriane Tim & Eric Awesome Show og Check It Out! with Dr. Steve Brule (laga i samarbeid med Eric Wareheim og John C. Reilly) iscenesette han nyleg ein farse av ei teatersportsrettssak der han sjølv var både tiltalt og forsvarar. Brutal inkompetanse åleine gjorde at den drapstiltalte komikaren ikkje blei dømd. Heidecker er òg ein kompetent musikar, og Too Dumb For Suicide kan kan hende òg seiast å handle om inkompetanse og ansvarsløyse.

Mykje av Heideckers komikk er absurd, og har eit preg av mørk, intern pokerfjeshumor som kan skape tvil hjå uinnvigde. Trump Songs er derimot ganske utvitydig: Platetittel og omslag driv openbert harselas med presidenten. Songane, som gjerne har eit sterkt preg av amerikansk folkrock, er skrivne hurtig i harnisk – «with the blood still boiling from whatever indignity or absurdity had popped up on my newsfeed that day» – og er greie korkje med Trump, kvit makt-forkjemparar eller alt-right-internettroll. Det er sjeldan subtilt, og det er trass alt på sin plass. Som Heidecker har uttalt: «Let’s hope I don’t write any more of these, but I probably will.» Heldigvis er songane ganske fine, inkludert «MAGA», der Heidecker læt nett slik Trump truleg ville ha høyrdest ut som revyartist, og avsluttingssporet, framført av Father John Misty.

Rasmus Hungnes

Rasmus Hungnes er musikar og fast platemeldar i Dag og Tid.