Elektronika

Mukqs:

To Get Up

Doom Trip

Mukqs er pseudonymet til den Chicago-baserte musikaren og biletkunstnaren Maxwell Allison. Musikken hans vert spelt inn live rett på band, utan overdubs – det vil seie at heile lydbiletet blir produsert i sanntid, ved hjelp av synthesizerar, loopmaskiner, trommemaskiner, effektboksar og annan elektronikk.

Mukqs er ein produktiv type og gir gjerne ut fleire album i året, oftast i kassettformat i tillegg til digitale nedlastingar. Walkthrough frå 2016 læt som eit avslappande lydspor til eit TV-spel frå slutten av 80-talet, ein slags 8-bits ambientmusikk med element av kinesisk tradisjonsmusikk, medan 11,666,666,666,666,666,666 frå fjoråret har eit meir dystopisk, Blade Runner-aktig preg. Tittelen svarar til universets vekt i pund, ifølgje frijazzpioneren Sun Ras’ kosmologi.

Den japanske tittelen det her er tale om, er – omsett til engelsk – To Get Up, og peikar både mot å kome seg opp for å danse og å stå opp om morgonen. Fleire av spora manar fram mentale bilete av morgongry, som opningssporet med syntetiske jungeltrommer, medan andresporet, som er det mest medrivande, læt som ein elektronisk soloppgang. Femtesporet, «Ronaldo Kuruki», tar oss med inn i eit nærast new age-aktig, leikent og flytande synthlandskap som saumlaust sklir vidare inn i det neste sporet, som minner om krautrock à la Ash Ra Tempels New Age of Earth (1976). Mukqs er vel verd å verte kjent med.

Rasmus Hungnes

Rasmus Hungnes er musikar og fast platemeldar i Dag og Tid.