Då eg for ei tid sidan kom meg på kino og fekk sett Andrea Arnolds strålande road movie av året, American Honey, som vart heidra med juryprisen i Cannes, vart det akkurat den flotte filmopplevinga eg hadde håpa på, med strålande rolletolkingar av Sasha Lane (Star) og Shia LaBeouf (Jake) og flott fotografi ved Robbie Ryan.

Og så var det musikken. Fleire av nøkkelscenene er utstyrde med uhyre velvalde musikkval, og då særleg den der Jake og Star durar langs vegen til Mazzy Stars slitesterke «Fade Into You».

Snarare enn å utsmykke American Honey spelar musikken ei sentral rolle når det gjeld å vise oss figurane og den verda dei lever i. Sjå berre korleis filmen vender tilbake til «We Found Love» (Rihanna og Calvin Harris) med stadig nye implikasjonar. Favorittscena mi er kanskje likevel bilscena gjennom neonopplyste gater som får følgje av The Raveonettes’ «Recharge & Revolt».

Øyvind Vågnes