Jon Hustad

jon@dagogtid.no

Sigurd Aase eig 50 prosent av Trygge Barnehager AS. Han meiner det er underleg at Hagen-utvalet og dei som kritiserer dei private, ikkje er opptekne av kor billig dei private barnehagane driv.

– Eg ser at det ikkje vert ein debatt om at dei private barnehagane vert drivne 2 milliardar billigare enn dei kommunale. Den debatten er fråverande. No har vi private halvparten av marknaden. Og vi driv altså 2 milliardar billigare. Burde ikkje røntgenblikket vorte vendt mot dei kommunale som driv så mykje dyrare og kostar skattebetalarane mykje?

– Men utvalet peiker på at mange private selskap har fått billige eller gratis eigedomar, som dei så har selt vidare med svært høg profitt. Det må du vera samd i er uheldig?

– Dette har eg ikkje god kjennskap til. Det dreier seg ikkje om våre barnehagar. No har vi rett nok 180 eigedomar, og eg har ikkje full oversikt. Men vi har kjøpt ei rekkje private tomtar til marknadspris. Andre får svara for det dei har gjort.

– Men de har hatt driftsmarginar på mellom 9 og 12 prosent dei siste åra. Det meiner utvalet er uvanleg høgt.

– I 2019 har vi ein driftsmargin på 4,3 prosent. Tidlegare år er eigedom inkludert, så tala i NOU-en gjev ikkje eit rett bilete. Men ja, når vi har så lågt sjukefråvær som vi har, og dei tilsette trivst godt, får vi lægre personalkostnader. Typisk er personalkostnaden 80 prosent. Vi treng i mykje mindre grad enn andre å nytta vikarar. Det er no eingong slik at om ein driv godt, får ein gode resultat. Dersom ein leverer betre bilar enn andre, fortener ein ikkje å få halda på den gode verdiskapinga ein då har?

– Men de har tent så godt at de har hatt råd til å investera i amerikansk olje, som de har tapt stort på. Det kan verka litt ekstremt sett frå utsida?

– Det der er ei mistyding. Ein har ikkje tapt noko før ein har selt. Men ja, vi har skrive ned verdiane. Når oljen i bakken vert mindre verd, skriv ein ned. Men verdien kan òg gå opp att. Då skriv vi opp. Ein har ikkje tapt før ein har selt med tap.

– Utvalet er uroleg for dei kompliserte selskapsstrukturane. Dei meiner det opnar for skatteplanlegging. De har svært mange selskap?

– Kvar einaste barnehage hjå oss er eit sjølvstendig aksjeselskap. Eg skjønar ikkje kva som er komplisert hjå oss. Og det vi gjer, har ingenting med skatteplanlegging å gjera. Vi har betalt overskotsskatt på alt. Vi prøver å forvalta pengane så godt vi kan, og byggja verdiar og arbeidsplassar der vi investerer. Og om den dagen kjem at vi tek ut utbyte på personleg hand, skal vi sjølvsagt betala skatt på det. Vi har ikkje gjort noko som ikkje andre selskap gjer, same kva media og andre måtte meina. Vi driv godt og prøver å få høgre avkasting enn det ein får på bankkonto.