Politikk

Haakon Melhuus

I Dag og Tid 28. september ausar Ivar Jørdre ut av seg det han maktar av uvilje og hat mot Nato, Vesten og Forsvaret. Vi er leigesoldatar i imperialismens teneste, servile miljøsyndarar og velviljuge militærhissarar som øyder skattepengane på spenningsdrivande krigshissing og trugsmål i staden for å bruka dei på helse, skule, arbeid, miljø og infrastruktur, seier han.

Nokre spørsmål til Jørdre tvingar seg da fram: Skal vi melda oss ut av Nato og leggja ned forsvaret vårt? Har vi sjølv noko ansvar for å tryggja grenser, fred og stabilitet i vår del av verda? Er det nokon annan grunn enn flaks og rein godvilje som har gjort at Noreg har kunna leve fritt og sjølvstendig i over 70 år? Kan det vera lurt å halda saman med andre demokratiske land og folk vi har mange sams interesser med, geografisk og økonomisk, kulturelt, sosialt og politisk?

Er det ei rasjonell årsak til at dei fleste av dei tidlegare sovjetiske vasallstatane har vore raske med å søkja om å bli med i Nato og EU? Kjenner Ivar Jørdre seg trygg på naboskapen og utviklinga til eit stendig meir sjølvbevisst og einsretta Russland med tsar Putin på toppen? (At USA har vore tankelaus nok til å velja ein sær og eigenrådig Trump til president, gjer ikkje saka betre!)