Rettsvesen

Øivind Østberg

Å diskutere prinsippa for tilhøvet mellom den dømande og den utøvande makta med Fløgstad er som å diskutere med ein vegetarianar korleis biffen skal steikast. Det vert ein dårleg dialog.

Les også «Juntaen styrer».

Når han skal ha det til at høgsteretten «herskar» i USA, er «upresist» eit svakt ord. Interessant at dette er henta frå ein spaltist i Washington Post. Dette er demagogi eigna til å hisse opp folk. Presidenten sjølv har blåse til elden ved å hevde at domarane står for ein «ekstrem ideologi».

Aborttilhengjarar har demonstrert utanfor husa til domarane, og ein væpna mann vart i juni arrestert nær heimen til domar Kavanaugh, sikta for forsøk på kidnapping eller drap. Samstundes gjennomfører føderale politiorgan massive raid mot fredelege pro-liv-forkjemparar og annan konservativ opposisjon, som Det kvite huset no har definert som «innanlandske terroristar». Me er vitne til ein politisert bruk av den føderale justismakta i USA som saknar sidestykke i landet, jamvel om norske medium teier om dette.

Tulsi Gabbard, vald til kongressen frå Hawaii for demokratane, har fått nok av dette og forlèt no partiet. Hennar varsku burde uroe alle som har ein trevl av forståing for at rettsstatlege prinsipp er ei sivilisatorisk vinning.

Øivind Østberg er advokat.