Helse

Arne Sølvberg

I leiaren for Dag og Tid den 3. februar går redaktør Svein Gjerdåker sterkt i rette med helsebyråkratane i Trøndelag for at dei ser ut til å ha overkøyrt dei medisinske fagfolka når dei har utvikla journalsystemet Helseplattformen.

Det er uheldig for Dag og Tid at kritikken kjem same dag som det såkalla Bovim-utvalet kjem med sin NOU, som konkluderer med at det nåverande helsestellet brukar 20 prosent av den norske arbeidskrafta og ikkje kan veksa meir. Der er ikkje fleire folk å ta av dersom arbeidsstyrken skal auka. Helsestellet må i framtida ta seg av fleire pasientar for kvar tilsett. Helsestellet må reorganiserast. Arbeidskrafta må frigjerast frå byråkratisk plunder og heft til pasientnært arbeid. Helseplattformen er eit første norsk forsøk på å få til eit journalsystem for den nye tida.

All forandring møter motstand. Overgangen frå papiravis til e-avis gjekk ikkje utan problem heller. I helsestellet byrja ein med digitaliseringa av byråkratiet for 50–60 år sidan, utan spesielt hell. For første gong ser det nå ut til at ein kan få til eit system som kan fungera, trass i ein del veikskapar. Derfor bør arbeidet med Helseplattformen applauderast, ikkje kritiserast.

Pressa er rask til å ta opp kritikk. Eit godt råd er: Ikkje tru alt du høyrer på bygda!

Arne Sølvberg er professor emeritus ved Institutt for datateknologi og informatikk ved NTNU.