Om du høyrer til mellom dei som er glad i det banebrytande Wilco-albumet Yankee Hotel Foxtrot (2001), bør du sjekke ut det Barry Jenkins har gjort med plata på miksteipen Yankee Purple Foxtrot som dukka opp i haust.

Filmregissøren Jenkins (f. 1979) vil vere kjend for lesarar som mannen bak den framifrå spelefilmen Moonlight (2016), og vi kan snart sjå fram til ein TV-serie basert på Colson Whiteheads roman The Underground Railroad (2016), der han står for både manus og regi. At Jenkins også likar å tukle kreativt med innspelt musikk, visste ikkje eg, trass i at han i 2017 tok føre seg to Grizzly Bear-plater, Veckatimest (2009) og Painted Ruins (2012).

Med seg på Yankee Purple Foxtrot har han DJ Candlestick, OG Ron C og The Chopstars.

Då Jeff Tweedy og Wilco gav ut Yankee Hotel Foxtrot for to tiår sidan, braut dei opp rockekomposisjonane i botnen av albumet. Glenn Kotche var ny på perkusjon, Jim O’Rourke produserte, og begge desse to vekte ein dekonstruksjonistisk glød i Tweedy. Denne gløden er godt teken vare på i ei speleliste som i stil liknar på det Rolling Stone omtalar som «a chopped-and-screwed mixtape».

Øyvind Vågnes