Det finst vel knapt ein meir solid forvaltar av americana enn Gillian Welch, som frå og med debuten Revival (1996) saman med David Rawlings har levert nokre av dei finaste utgivingane dei siste 25 åra. Time (The Revelator) (2001) står som ein bauta i diskografien, men ei utfordring for ein artist som legg lista så høgt, er at ein vert såpass kresen på kvaliteten at ein kanskje vert litt knipen. Welch høyrer ikkje til mellom dei som pøser ut halvferdig materiale eller tømmer skuffene når det har vore stille ei stund. Trufaste lyttarar kan verte rastlause, tørste på meir.

Dermed har det vore gledeleg overraskande å få høyre ei heil rekkje opptak frå den kanten i år. Ein orkan reiv taket av studioet til Welch og Rawlings i mars, og hendinga fekk dei til å sjå sitt eige arkiv i nytt lys. Utfallet vart utgivinga Boots: The Lost Songs, som i tre delar byr på innspelingar laga i løpet av ei produktiv helg i 2002, porsjonerte ut i inneverande kalenderår – dei første to dosane kom i juli og i september.

Volume 3 kom nett ut, og snart går det an å skaffe seg heile årets serie i ein boks, totalt 48 songar, på vinyl eller CD. Eg er ikkje åleine om å vere glad for denne gåvepakken frå Welch – det ville ha vore trist om ikkje dette sterke materialet skulle nå ut.

Øyvind Vågnes