Jazz

Gabriela Garrubo:

Rodando

Gabriela Lie Garrubo, vokal og piano; Johannes Aagaard, gitar; Nils Henrik Sagvåg, bass; Cato Lyngholm, trommer; Audun Humberset, perkusjon; Vetle Junker, synth og gitar; Jonas Hamre, saksofon (2, 7 og 8); Olav Imerslund, bass (9 og 10); Carmen Boveda, cello (8).
NXN Recordings

Debutplata til norskbrasilianske Gabriela Lie Garrubo har det vore knytt store forventningar til. Ho har gjort eit sterkt inntrykk på konsertscenen med eit sjølvkomponert repertoar. Musikken er ei blanding av tradisjonell brasiliansk musikk med innslag av bossanova og moderne jazz.

Ho er ein spanande komponist. Tekstane, som er både på portugisisk og engelsk, tek opp eksistensielle spørsmål som enkelt sagt handlar om å finna seg sjølv i ei kompleks, men vakker verd. Det er likevel Garrubo som formidlar mellom linjene som er det mest interessante.

Uttrykket kan verka skjørt og florlett, som i «Stars» og «Bells», men med pondus og autoritet når dette trengst, som til dømes i «A-Chave», der Hamre trør til med eit av dei betre kora på plata. Uansett kva modus det går i, har Garrubo full kontroll på tone og rytmikk. Ho er overraskande komplett som vokalist.

Bandet spelar tett og fint. Dei får det meste ut repertoaret. Det er lite rom for improvisasjon. Her er fokuset på Garrubo som tekstforfattar og låtskrivar.

Ikkje bli overraska om du ser denne plata som ei av dei nominerte til Spellemannprisens opne klasse.

Lars Mossefinn

Lars Mossefinn er frilans journalist og fast jazzmeldar i Dag og Tid.