Samtidsmusikk

Andrea Gior­dano:

Àlea

SOFA

Den oslobaserte italienske komponisten Andrea Giordano (f. 1995) har studert jazz og komposisjon ved Noregs musikkhøgskole, mellom anna under rettleiing av Sidsel Endresen.

Denne plata, der ho sjølv spelar organetto og syng, er sett saman av elleve satsar framførte av tolv musikarar i ulike kombinasjonar, der alle spelar akustiske instrument. Likevel er det mange av klangane som like gjerne kunne vore laga av elektroniske instrument. I det heile er det tilhøvet mellom lett attkjennelege lydar (til dømes harpe, tverrfløyte, songstemme) og det udefinerbare som gjer denne musikken spanande.

Uttrykket er neddempa og meditativt, men ikkje utflytande og preglaust, slik det kan ha lett for å bli i mykje av den dronebaserte musikken. Det er eit alvor som pregar musikken, som er tileigna minnet om komponistens ven og mentor Alessandra Giachero. Det sterkt personlege i musikken vert ytterlegare understreka sidan det som finst av tekst i dette verket, er på ein gamal dialekt frå Piemonte som komponisten bruka då ho snakka med bestemor si.

Dette prosjektet er svært personleg, og til dels nostalgisk. Likevel er det ikkje attendeskodande, men byd på originale instrumentringar og speleteknikkar. Her er element frå fortida – både konvensjonelle akkordar og instrumentlydar – men likevel såpass uvanleg samansette at dette verkar svært så forfriskande og nyskapande.

Sigbjørn Apeland

Sigbjørn Apeland er musikar, musikkvitar og fast meldar i Dag og Tid.