Det finst nok ein del lesarar der ute som smiler og nikkar når namnet til Randy Crawford vert nemnt, for artisten naut ein særleg popularitet her til lands på 1980-talet, med plater som selde godt, og gjennom samarbeidet med gruppa Lava. 

I dag har det gått 70 år sidan Crawford vart fødd i musikkbyen Macon, i delstaten Georgia, men det var i New York ho tok dei første verkelege stega i karrieren, før ho etter kvart signerte platekontrakt der, med Columbia Records for 50 år sidan, i 1972. Førre og siste utgiving kom i 2008, No Regrets, og fann henne i det jazza hjørnet, i duo med pianisten Joe Sample.

Vi gratulerer med å innleie fredagskvelden med å spele av tittelsporet frå The Crusaders-albumet Street Life (1979), som det er umogleg ikkje å komme i brukbart humør av, og som ikkje ville ha vore det same utan Crawfords røyst – ein song som kom til å spele ei viktig rolle i karrieren hennar.

Følgjer opp gjer vi med balladen «Don’t Put All Your Dreams In One Basket» (Dorinda Morgan og Betty Hall Jones), kjend ikkje minst frå tolkingar ved Ray Charles, slik songen vert framført med nostalgisk autoritet av Crawford og Sample på No Regrets.

Øyvind Vågnes