Me har alt vore innom dei eddaliknande heltedikta som ikkje er komne med i hovudhandskriftet med eddadikt, og som i staden vert omtala som Eddica minora (Den mindre/ringare Edda). Men det finst òg nokre dikt med mytologisk innhald som ikkje er med i Codex Regius av Den eldre Edda. Dei «apokryfe» gudedikta har fått meir merksemd enn dei tilsvarande heltedikta, og to av dei er tekne med i alle dei norske omsetjingane: Balders draumar og Rigstula. I tillegg til dei har me Hyndleljod, Grottesongen, Grogalder og Fjolsvinnsmål. (Nokre reknar òg med Forspjallsljod.) Lat oss sjå nærare på to av dei.