Nynorsk

André Løyning

andre@dagogtid.no

Direktør Ottar Grepstad held jubileums- og avskilstale, Roger Erlandsen fortel om forfattaren og strategen Jostein Nerbøvik, ei eldsjel bak stiftinga av institusjonen, og Grete Riise fortel historia om Nynorsk kultursentrum.

– Fleire ambisiøse nøkkelpersonar har vore med på å gjere Nynorsk kultursentrum viktig for både språket og språkbrukarane. Dei får sin velfortente takk når vi feirar 25-årsjubileet i Aasen-tunet i haust, seier dagleg leiar Gaute Øvereng på nettsida til senteret.

Kulturminister Trine Skei Grande (V) skal legge ned blomar ved Ivar Aasen-bautaen i tunet og halde foredrag om samfunnsrolla til nasjonale kulturinstitusjonar. I tillegg lovar senteret ei kunstnarleg overrasking.

Ivar Aasen-tunet blei skipa 30. august 1993 med føremål om å bli eit nasjonalt dokumentasjons- og opplevingssenter for nynorsk skriftkultur. No har Nynorsk kultursentrum tre museum og tre språk- og litteraturfestivalar i tre fylke på Aust- og Vestlandet, og det digitale oppslagsverket Allkunne.no.

– Dei som drog dette i gang i 1990, ville for alt i verda at det skulle bli ein nasjonal kulturinstitusjon. Det målet nådde dei gjennom eit stortingsvedtak hausten 1995. Det er knapt til å fatte kor mykje dei arbeidde for å få dette til, seier direktør Ottar Grepstad, som frå 1. november overlèt direktørstolen til Per Magnus Finnanger Sandsmark.

Arrangementet er gratis og ope for alle.