Innsida går inn i den mørke tida med den gode tradisjonsmaten vel vitande om at lutefisken så langt ikkje har vore med i spalta vår, men no skjer det altså. Lutefisk er ein rett som høyrer til i tida før jol.

Denne veka vart lutefisksesongen innleidd med smaking av årets lutefisk på tradisjonsrike Gamle Raadhus i Oslo.

Mange lurar på om det verkeleg er lut ein brukar. Lut som elles vert brukt i industrielle formål.

Fisken, oftast ein skikkeleg flott torsk, vert lagd i vatn i fire–fem dagar. Så vert han lagd i ei blanding av lut og vatn i to dagar. Då svell fisken opp og mister halvparten av proteinet. Han vert lettare og meir blaut i fisken. Fisken er då giftig og må ligga minst ei veke i vatn for å kunne etast.

Innsida vil råda folk til å kjøpa ferdig luta fisk. Ikkje gjer dette sjølv, då det verkeleg kan gå gale.

Bak han gjerne i omnen. Dryss godt med salt på lutefisken ein time eller to før du skal setta han inn. Ha på litt pepar. Dekk fatet med folie og la det stå på 225 grader i ein halv times tid, alt etter kor tjukk fisken er.

Lutefisken skal lagast av den fremste tørrfisken. Det kan vera både lange og brosme, men kjennarar sver til tørrfisk av torsk frå Værøy eller Røst.

Sidan dette er eit festmåltid, er det naturlegvis spanande kva ein skal ha til. Mange vil ha ertestuing og poteter, gjerne òg bacon og baconfeitt, men så går det i ulike retningar. Nokre stader får ein lefse, sirup, brunost og kvitsaus.

Innsida tek han helst med eit godt glas norsk øl og ein dram av den typen som har karve i seg og har vore på fat.