Naturen inspirerar mang ein forfattar. Og få forlag kan skilta med meir frå naturen enn tradisjonsrike Sprakje Forlag frå Harabotn.

Lista i år er imponerande, slik det plar vera frå den gjengen.

Det mange nok var spente på i år, var om nestoren Halbein Kolve kom med ny roman.

Og det gjorde han. Kritikarane har vore heilt over seg. Knapt nokon pensjonist i Noreg har ei så produktiv liste å visa til.

Forutan den nye romanen, «Gaupa skrik i Vassbygdgjelet», har Kolve levert to bygdebøker – «Kveitvik gjennom 150 år» og «Bygdebok for Bjorstad og omegn» – og ei bok om geitavl i Kalvsmørsfjorden.

Innsida hyllar gamle Kolve med ei liste over det ein her i huset meiner er dei viktigaste verka hans.

Jervtida I, II og II 1957-59

Døden i kram sno, krim 1971

Fjelloppsynsmann sakna i Tverråsberget, krim 1973

Elgoksen Svein, barnebok 1977

Reingjetar Sigve Fjauset, biografi 1979

Tolv dagar ved Haugdalsvatnet, 1980

Der Dagfinn otra, minnebok 1984

Det skreik ein tiur på Vangsmosæter, 1985

Så fekk dei storbukken til slutt, 1987

Ei løe der kjærleiken ikkje bur, roman 1990

Utanom Kolve kan Sprakje Forlag skilta med tre bøker om slakting, nyteikna Kartbok for Øystre Slide volum 3 og 4, ei bok om fjelloppsynsvesenet og ein serie om sylting.

Fleire skilt, naturlegvis

Innsida køyrer vidare med gode skilt. Tilfanget er godt og Innsida er verkeleg nøgd med at dette er så populært hjå lesarane våre at det strøymer på med gode døme.

Frå Einar Sveen har me fått bilete av bilen til serviceverksemda Bagge Broos. Sveen peikar på at dei kanskje skulle ha starta servicen hjå seg sjølv.

Monrad Svingen har sendt oss bilete av ein parkeringsautomat i Karenslyst Alle i Oslo. Der kan ein putta på pengar eller betala for å parkera, men i heile området er det parkering forbode. Ikkje i tråd med gode retningslinjer for skilting, poengterer Svingen.