Revolusjon i løynd
Kva denne runden WTO-forhandlingar endar med, om det da kjem til noka semje, er høgst uklårt. Dramatikken i dei norske media dreiar seg førebels berre om forhandlingsplattforma til den såkalla G10-gruppa som Noreg har alliert seg med i WTO-forhandlingane. G10 er rike land som er nettoimportørar av mat, og inkluderer mellom anna Japan og Sveits. No har gruppa opna for å godta tollkutt på opptil 60 prosent for landbruksvarer, noko som vil gje ein langt hardare konkurranse og lågare prisar for norsk landbruk.

Denne fundamentale endringa av vilkåra for landbrukspolitikken kom brått, og er ikkje eingong handsama i Stortinget. Samtalane i WTO har vore strengt hemmelege. Og etter langvarige forhandlingar venta utanriksminister Jan Petersen heilt til førre fredag med å fortelje leiarane for dei påtroppande regjeringspartia om kva G10-forslaget gjekk ut på. Da var det for seint å gjere noko – det einaste alternativet for dei raud-grøne ville vore å tilrå å trekkje Noreg frå G10-plattforma, og bli ståande åleine i WTO-forhandlingane.

Petersen skal ha fått spørsmål frå Senterpartiet om han ikkje burde konsultert med Stortinget om det nye WTO-standpunktet, skriv Nationen. Men nei – for Stortinget hadde enno ikkje konstituert nokon utvida utanrikskomité etter valet. Dermed var det ingen å konsultere, meinte Petersen.

Hardt press
Det forslaget G10 har samla seg om, er svært dramatisk for norsk landbruk. Men det kan vere meir dramatiske ting enn som så i vente. For sjølv om Noreg og dei andre G10-landa har strekt seg eit godt stykke i liberaliseringslei med dette forslaget, er dette neppe nok for dei store landbrukseksporterande landa i verda.

Landa i G20-gruppa, som mellom anna inkluderer Argentina, Brasil, Kina, India, Sør-Afrika og Indonesia, ønskjer ei langt meir radikal liberalisering av handelen med jordbruksprodukt. USA, som sjølv subsidierer landbruket sitt tungt, har tilbydd seg å fjerne eksportsubsidiane sine i løpet av fem år og kutte i anna støtte. Men USA har svært aggressive krav til liberalisering frå andre land. Mellom dei landa som her blir eksplisitt nemnde av USA, er Japan, som er med i same gruppe og forhandlar på same plattform som Noreg. Også EU-landa er i rørsle i retning av store toll- og subsidiekutt, og vil gå vesentleg lenger enn det G10-gruppa har sagt seg viljug til. EU krev til dømes at i-land land som Noreg reduserer produksjonsstøtta si til landbruket med 45 prosent.

Mot alt dette blir G10-landa ein puslete liten gjeng. Forskingsdirektør Sjur Spildo Prestegard i Norsk institutt for landbruksforsking seier bastant i Nationen om G10-forslaget:
– Sluttresultatet blir verre enn dette.

Det beste norske bønder kan håpe på, er truleg ein kollaps i WTO-forhandlingane. Dei neste to månadene blir avgjerande – i desember held WTO ministermøte i Hongkong, og der kan mykje av framtida for landbruket verda rundt bli vedteken.