Dag og Tid

«Han heitte eigentleg noko so merkverdig som Streckfus Persons, men tok etter kvart namnet Capote etter stefaren. Han debuterte i 1948 med ‘Other voices, other rooms’, og den boka som Barrabas siterer frå er vel eigentleg novella ‘Breakfast at Tiffany’s’, og alle vi som er gamle nok hugsar rådyraugene til Audrey Hepburn i denne filmen...
Eg seier ikkje meir...
Beste kjend er vel Capote for dokumentarromanen ‘Med kaldt blod’ frå 1966, som bana nye vegar i denne sjangeren. Romanen handlar om eit brutalt mord i USA, og Capote lar også mordarane sleppe til i boka, etter mange og lange samtaler med dei. Boka vekte sterk diskusjon då ho kom. Kor langt kan ein forfattar gå når det gjeld å skildra slike hendingar? Nokre av kritikarane hevda at tittelen på boka råka forfattaren like mykje som mordarane.
Det kan vere interessant å gi att noko som Jean Cocteau sa om Capote då han debuterte: ‘Ta ikkje feil av han. Han liknar ein ti år gamal engel. Men han er utan alder og har ein stygg tankegang.’
Det er i alle fall ikkje tvil om at dei personane som Capote skildrar, ligg langt frå englestatusen», slår Gunder Runde fast.

Er «Frokost på Tiffany» ei novelle? Forlaget Tiden har nyleg gjeve ut ‘Frokost på Tiffany’ i billegutgåve, og der pregar Audrey Hepburn med rådyr-augo omslaget. Og boka, novella eller romanen, er på 118 sider.
Jan Olav Gatland kallar boka kortroman, og viser til kva Norman Mailer har uttalt: «Truman Capote is the most perfect writer of my generation. He writes the best sentences word for word, rhythm upon rhythm.»
Ingrid Naddvik har funne fram til ei utgåve der Karen Blixen har skrive forordet, og der heiter det: «Fortryllelsen ved Truman Capote’s Forfatterskab er dets særegne Kombination af Luftighed og Vægt. Vi følger det som vi følger et Egerns Flugt i et Træ, der er på een Gang aldeles fantastisk og fuldkommen logisk, – den flyvende Figur kan kaldes baade letbenet og fortættet».

Arne Thorvik frå Tønsberg fortel at Capotes forleggjar var redd for rettsleg forfølging frå juvelforretninga Tiffany, og at han vurderte å endra tittelen til «Follow That Blonde».
I en fjern ungdom har jeg selv gått over Brooklyn Bridge, deretter helt opp til Tiffany’s på 57. gate, også opp mot ‘East Seventy-Eight Street, for å se de brune murblokkene som en gang var bebodd av partyjenta Holly Golightly, hovedpersonen i en underholdende, men like fullt vemodig novelle», fortel Torvik.

Thorleif Haukvik Skobba har skrive eit fyldig Capote-brev frå eit svaberg i Stavern. Han fortel at Truman Capote ville at «‘Answered Prayers’ skulle verta hovudverket, men det var ikkje fullført då han døydde. Nokre utdrag vart publiserte i magasinet Esquire i midten av 1970-åra».
Torleif får premien denne veka for svabergbrevet.

Elles så seier eg tusen takk for rett svar og nydeleg kort frå Ranveig Lundquist, Orkanger, rett svar og Hagerup-dikt frå Merete Hoel, rett svar frå Ole Nielsen i Oslo, Torill J. Strøm i Myre, Harald Spangen i Trondheim, Truls Johannessen i Fredrikstad, Steinar Teigen i Oslo, Henrik Wroldsen i Oslo, Brita Lundeland i Aurland, Lisbeth Halse Ytreberg på Østerås, Morten Rønning på Fjellstrand, Birgitte Berge i Rådal og Gunnar Bæra på Løten.
Og ikkje minst frå Tom Knappskog – i Colombo på Sri Lanka.
Tusen takk alle saman!
Eg er steikjande glad for å få så mange og fine svar!