Dag og Tid nr. 11, laurdag 15. mars 2003
Leiar:
Tortur i det stille
Dei første Taliban- og Al-Qaida-fangane kom til Guantanamo-leiren i byrjinga av fjoråret. No er det 650 fangar i leiren. Minst ti prosent av dei er sende til USA-basen på Cuba på grunn av mistak, skriv Los Angeles Times. Og det er rapportert om minst 20 sjølvmordsforsøk.
Både regjeringar og internasjonale menneskerettsorganisasjonar har kritisert USA i skarpe vendingar for ikkje å halda seg til den internasjonale folkeretten. USA krenkjer Geneve-konvensjonen ved å nekta fangane både krigsfangestatus og rettssak. Generalsekretæren i den danske Raudekrossen har kalla det for ein «rettsleg skandale».
Endå alvorlegare er det som skjer i Afghanistan. I desember i fjor døydde to afghanske fangar som var til avhøyr på den amerikanske militærbasen i Bagram. Dødsfalla vert klassifiserte som drap, og The Guardian skriv at dei skal etterforskast. Tidlegare fangar på basen hevdar at fangane er lekte så stramt at blodstraumen stoggar. Dei er nakne – med hetter over hovudet, og dei vert slegne for at dei skal halda seg vakne. Dessutan overfører USA fangar frå Bagram-leiren til land som Egypt og Jordan, som tyr til brutale forhøyrsmetodar. Det er i strid med Geneve-konvensjonen.
Det er ikkje så lenge sidan forsvarsminister Kristin Krohn-Devold vitja dei norske styrkane i Afghanistan. Ho var imponert over innsatsen, men sa at ho ikkje kjende til mogelege brot på fangane sine rettar ved Bagram-basen. Sidan har fleire av dei store utanlandske avisene fortald om torturen. Statsråd Krohn-Devold må snarast gje uttrykk for at Noreg fordømmer mishandlinga av fangar både i Afghanistan og på Cuba. Det finst ingen gode grunnar til at Noreg skal vera alliansepartnar med styrkar som tyr til tortur.
Ottar Fyllingsnes
|
