Dag og Tid nr. 46, torsdag 16. november 2000
Bøker:
Kattar og andre dyr
Roald Kaldestad har laga ei morosam forteljing med gode karakteristikkar og slåande parodiar av tre dyr med ulike interesser, skriv Arne Sunde.
Roald Kaldestad:
Hevaykatten,
Discodansemusa og Pinnsvinet Phillip
Illustrert av
Ella K. Okstad
Cappelen
Kattar er in for tida, i alle fall i barnelitteraturen.
I 1996 kom Ragnar Hovland med Katten til Ivar Aasen møter hunden frå Baskerville. Fleire av årets barnebøker har anten kattar som hovud- eller bipersonar. I år har Lars Saabye Christensen kome med Mann for sin katt og Ingvar Ambjørnsen med Pater Pietros hemmelighet, den førebels siste forteljinga om hunden Samson og katten Roberto.
To sunnhordlandsforfattarar har òg kome med kattehistorier for barn i år. Den eine, Hans Sande, har ei lang rekkje barnebøker bak seg. Den andre, Roald Kaldestad, er son til far sin og debutant. Begge har levert frå seg to artige katteforteljingar. Fantastiske forteljingar om dyr er tydelegvis populære.
Roald Kaldestad si bok Heavykatten, Discodansemusa og Pinnsvinet Phillip er ei morosam forteljebok som lovar godt for ein debutant.
I boka møter vi tre ulike dyr. Heavykatten som diggar heavyrock, Discodansemusa som er ei pynte- og diskodokke. Pinnsvinet Phillip er ein intellektuell som likar poesi og klassisk musikk. Ein sommarferie har dei ingenting å ta seg til og fordriv tida med å vera på den lokale kafeen. Dei er grunnleggjande ueinige i alt og eitt heilt til dei får den glimrande ideen om å laga konsert der deira ulike musikkinteresser og kunstformer er representerte. Konserten vert ein suksess og reddar kafeen frå konkurs. Dei får endå til lokkande tilbod frå ein talentspeidar frå plateselskapet Schleip & Schlu, men berre discodansemusa ser ut til å la seg lokka.
Det er ikkje lett å få til ei "ny" dyreforteljing, men Kaldestad sitt sujett er godt. Kaldestad har laga ei morosam forteljing om tre dyr med ulike interesser slik vi gjerne finn det hjå menneska. Karakteristikkane er gode og parodien er slåande. Kaldestad er stødig språkleg og er god til å fortelja, men av og til kan det verka litt langtekkeleg. Likevel: desse tre dyra kan vi gjerne høyra meir i frå. Ella K. Okstad står for treffande illustrasjonar.
Arne Sunde
|
